2005-ci ildə biz, Uşaqların Ümumdünya Müdafiəsi Günü münasibətilə Milli Parkda məktəblilər arasında “ÇƏK!” Asfalt Üzərində Rəsm Müsabiqəsi keçirdik. Yarışa Bakının müxtəlif məktəblərindən 250-yə qədər şagird qatılmışdı.

İştirakçılar görünməmiş istedad nümayiş etdirdilər: “Biz azərbaycanlıyıq!” mövzusunda rəngli tabaşirlərlə yaradılan təsvirlər - milli bayrağımız, dəniz, səma, günəş, Qız qalası, əl-ələ vermiş uşaq rəsmləri - bir andaca Milli Parkın asfaltını bəzədi. Tanınmış rəssamlardan ibarət münsiflər heyəti, qalibləri müsabiqənin şərtlərinə uyğun olaraq üç yaş qrupunda (7-9, 10-12, 13-15) qiymətləndirirdi. Birinci yeri tutanlara fərdi kompüter, ikinci yerə layiq görülənlərə mobil telefon, üçüncü yerin sahiblərinə isə molbert və peşəkar rəsm dəsti hədiyyə olunmuşdu. Bununla yanaşı, hər bir iştirakçıya sertifikat verildi.